ਅੱਖ ਨਾਲ ਅੱਖ ਮਿਲਾਵੇ ਨਾ, ਮਨ ਵਿਚ ਚੋਰ ਹੋਵੇਗਾ।
ਦੁੱਖ ਦੇਖ ਕੋਈ ਹੰਝੂ ਆਵੇ ਨਾ, ਦਿਲ ਦਾ ਕਠੋਰ ਹੋਵੇਗਾ।
ਨਾ ਜਾਇਆ ਕਰ ਸੰਗੀਤਕ ਮਹਿਫਲਾਂ ਵਿਚ ਬਹੁਤਾ ਤੂੰ,
ਸੁਰਾਂ ਦੇ ਨਾਂ ਉੱਤੇ ਉੱਥੇ ਸ਼ੋਰ ਹੋਵੇਗਾ।
ਹੁਣ ਰਾਜਨੀਤੀ ਵਿਚ ਮੁੰਡਾ ਮੱਲ੍ਹਾਂ ਮਾਰੀ ਜਾਂਦਾ ਏ,
ਪੜ੍ਹਨ-ਲਿਖਣ ਦੇ ਵਿਚ ਥੋੜ੍ਹਾ ਕਮਜ਼ੋਰ ਹੋਵੇਗਾ।
ਮੰਨ ਲਿਆ ਕਿ ਨਾਂ ਤੇਰਾ ਵੀ ਹੀਰ ਸਲੇਟੀ ਏ,
ਪਰ ਰਾਂਝਾ ਇਕੋ ਜੰਮਿਆ ਸੀ, ਨਾ ਹੋਰ ਹੋਵੇਗਾ।
ਚੰਡੀਗੜ੍ਹ ਜਿਹਾ ਸੋਹਣਾ ਸ਼ਹਿਰ ਨਾ ਬਣਿਆਂ ਨਾ ਬਣਨਾ,
ਸੁਣਿਆ ਏ ਨਾ ਦੂਜਾ ਕੋਈ ਲਹੌਰ ਹੋਵੇਗਾ।
ਜੇ ਚੱਲਦਾ ਰਿਹਾ ਇੰਝ ਹੀ ਛੋਟੇ ਨਾਂਵਾਂ ਦਾ ਰਿਵਾਜ਼,
ਇਕ ਦਿਨ ਨਾ ਕੋਈ ਸਿੰਘ ਤੇ ਨਾ ਕੋਈ ਕੌਰ ਹੋਵੇਗਾ।
ਮਿਹਨਤ ਕਰਕੇ ਕਰ ਗਏ ਤਰੱਕੀਆਂ ਬਹੁਤ ਸਾਰੇ,
ਤੁੱਕੇਮਾਰ ਐਨ.ਪੀ. ਜਿਹਾ ਕਿਹੜਾ ਕੰਮਚੋਰ ਹੋਵੇਗਾ?
ਨਰਿੰਦਰ ਪਾਲ ਸਿੰਘ ਜਗਦਿਓ
No comments:
Post a Comment