ਅਕਸਰ ਭੁੱਲ ਜਾਂਦੀਆਂ ਨੇ ਬਹੁਤੀਆਂ ਗੱਲਾਂ,
ਯਾਦ ਰਹਿ ਜਾਂਦੀਆਂ ਛੋਟੀਆਂ-ਛੋਟੀਆਂ ਗੱਲਾਂ!
ਇੰਝ ਟੁੱਟ ਜਾਂਦੇ ਨੇ ਗੂੜੇ ਤੇ ਨਜ਼ਦੀਕੀ ਰਿਸ਼ਤੇ,
ਜਦੋਂ ਦਿਲ ਦੀਆਂ ਵਟਾ ਨਹੀਂ ਹੁੰਦੀਆਂ ਗੱਲਾਂ।
ਕੁਝ ਹੱਸ ਕੇ ਤੇ ਕਈ ਸੜ-ਸੜ ਚਰਚੇ ਕਰਦੇ,
ਕਿੰਨੀਆਂ ਮਸ਼ਹੂਰ ਨੇ ਤੇਰੀਆਂ-ਮੇਰੀਆਂ ਗੱਲਾਂ!
ਜ਼ਿਆਦਾ ਦਿਲ 'ਤੇ ਨਾ ਲਾਇਆ ਕਰ ਸੱਜਣਾ,
ਊਈਂ ਹੁੰਦੀਆਂ ਨੇ ਇਹ ਅਖਬਾਰ ਦੀਆਂ ਗੱਲਾਂ!
ਮੇਰੇ ਵਾਂਗ ਹੀ ਕਰਿਆ ਕਰ ਤੂੰ ਗੱਲ ਸਿੱਧੀ,
ਨਾ ਕਰ ਯਾਰਾਂ ਗੋਲ-ਮੋਲ ਤੇ ਖਚਰੀਆਂ ਗੱਲਾਂ।
ਬੇਝਿਜਕ ਖੋਲ੍ਹ ਸਕਦੈ ਤੂੰ ਦਿਲ ਮੇਰੇ ਸਾਹਮਣੇ,
ਦੱਸ ਭਲਾ, ਮੈਂ ਤੇਰੇ ਤੋਂ ਕਦੇ ਲਕੋਈਆਂ ਗੱਲਾਂ?
ਪੈ ਗਿਆ ਹੈ ਆਪਣਾ ਮੋਹ ਰੂਹਦਾਰੀ ਵਾਲਾ,
ਸਾਡੇ ਵਿਚਕਾਰ ਨਾ ਹੋਣ ਹੁਣ ਵਿਚਲੀਆਂ ਗੱਲਾਂ!
ਹਰੇਕ ਪਲ ਨੂੰ ਤੂੰ ਜੀਣਾ ਸਿੱਖ ਲੈ ਐਨ.ਪੀ!
ਛੱਡ ਪਰ੍ਹਾਂ, ਹੁਣ ਅਗਲੀਆਂ-ਪਿਛਲੀਆਂ ਗੱਲਾਂ।
