ਦੋ ਗੱਲਾਂ ਦਿਲ ਦੀਆਂ

ਪਿਆਰ 

ਕਿ ਕੁਝ ਕਹਿਣ ਲਈ

ਬਕ-ਬਕ ਕਰਨਾ 

ਜ਼ਰੂਰੀ ਨਹੀਂ ਹੁੰਦਾ

ਇਕ ਚੁੱਪ

ਅੱਖਾਂ ਦੀ ਭਾਸ਼ਾ

ਇਸ ਦਾ ਕੋਈ ਤੋੜ ਨਹੀਂ ਹੁੰਦਾ।

ਮੈਂ ਕੀ ਕਹਾਂ

ਮੈਂ ਕੀ ਲਿਖਾਂ

ਕਿਹੜੇ ਸ਼ਬਦਾਂ ਨੂੰ ਵਰਤਾਂ

ਕਿ ਮੈਂ ਕਵੀ ਨਹੀਂ

ਕੋਈ ਬੁੱਧੀਜੀਵੀ ਨਹੀਂ 

ਬੋਝਲ ਅੱਖਰਾਂ ਦਾ ਜਾਣੂੰ ਨਹੀਂ

ਇਕ ਸਧਾਰਣ ਇਨਸਾਨ

ਜਿਵੇਂ ਤਾਰੀਫ ਕਰਦਾ ਹੈ

ਜਿੱਦਾਂ ਦਿਲ ਦੀ ਕਹਿੰਦਾ ਹੈ

ਓਦਾਂ ਹੀ

ਮੈਂ ਵੀ ਆਖ ਦਿੰਦਾ ਹਾਂ

ਕਿ 

ਮੈਂ ਤੈਨੂੰ ਬਹੁਤ ਪਸੰਦ ਕਰਦਾ ਹਾਂ

ਤੇਰੇ ਨਾਲ ਪਿਆਰ ਕਰਦਾ ਹਾਂ। 

'ਨਵ ਰੀਤ'

ਇਕ 'ਨਵ ਰੀਤ' ਚਲਾਵਾਂਗੇ

ਤੂੰ ਸੁਹਜ, ਸਿਆਣਪ ਤੇ ਸੋਝੀ ਰੱਖੀ

ਆਜ਼ਾਦੀ ਮੈਂ ਦੇਵਾਂਗਾ

ਤੂੰ ਉਡਾਰੀ ਭਰਨ ਦੀ ਕੁਵੱਤ ਰੱਖੀ

ਸੁਨਹਿਰੀ ਖੰਭ ਮੈਂ ਦੇਵਾਂਗਾ

ਤੂੰ ਫਿਕਰਾਂ, ਚਿੰਤਾਵਾਂ ਤੋਂ ਮੁਕਤ ਰਹੀਂ

ਹਾਸੇ ਤੇ ਸ਼ਰਾਰਤਾਂ ਮੈਂ ਦੇਵਾਂਗਾ।

ਕਿ ਤੂੰ ਮੇਰਾ ਹੀ ਰੂਪ ਹੈ

ਅਸੀਂ ਇਕਮਿੱਕ ਹਾਂ

ਜਿੱਦਾਂ ਮੈਂ ਰੀਤਾਂ-ਰਵਾਇਤਾਂ ਤੋਂ ਉਲਟ ਹਾਂ

ਓਦਾਂ ਹੀ ਤੂੰ ਵੀ

'ਨਵਰੀਤ' ਬਣ ਕੇ

ਦੁਨੀਆਂ ਦੇ ਅੰਬਰ 'ਤੇ ਛਾ ਜਾਵੀਂ!

ਆਪਾਂ ਮਿਲ ਕੇ

ਇਕ 'ਨਵ ਰੀਤ' ਚਲਾਵਾਂਗੇ...