ਕੁਝ ਖਿਆਲਾਂ ਨੂੰ ਸਮਝਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ,
ਦੂਜੀ ਵਾਰੀ ਦਿਲ ਲਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਕੁਝ ਲੋਕੀਂ ਜ਼ਿੰਦਗੀ ਵਿਚ ਮਿਲਦੇ ਪਲ ਭਰ ਲਈ,
ਸਾਰੀ ਉਮਰ ਉਨ੍ਹਾਂ ਨੂੰ ਭੁਲਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਤਿੰਨ ਲੱਖ ਦੀ ਗੱਡੀ ਲੈਣੀ ਏਡੀ ਔਖੀ ਗੱਲ ਨਹੀਂ,
ਪਰ ਪੈਟਰੋਲ ਉਸ ‘ਚ ਭਰਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਕਿਰਾਏ ਦੇ ‘ਮਕਾਨ’ ਕਦੇ ਵੀ ‘ਘਰ’ ਨਹੀਂ ਬਣਦੇ ਹੁੰਦੇ,
ਜ਼ਿੰਦਗੀ ‘ਚ ਅਪਣਾ ਘਰ ਬਣਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਰੱਜ-ਰੱਜ ਕੇ ਖਾਧਾ ਜਦ ਬਿਲ ਮਿੱਤਰ ਦਿੰਦੇ ਸੀ,
ਹੁਣ ਖੁਦ ਖਰਚਾ ਕਰਕੇ ਖਿਲਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਆਟੋ ਰਿਕਸ਼ਾ ਵਿਚ ਤਰ੍ਹਾਂ-ਤਰ੍ਹਾਂ ਦੇ ਲੋਕੀਂ ਮਿਲਦੇ ਨੇ,
ਸਭ ਨੂੰ ਰਿਸ਼ਤੇਦਾਰ ਬਣਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਦੁੱਖ ਏਨਾ ਨਾ ਲੱਗਾ ਪੁੱਤ ਨੇ ਘਰ ਜਦ ਅੱਡ ਕੀਤਾ,
ਪਰ ਧੀ ਨੂੰ ਡੋਲੀ ਬਿਠਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਕਿੰਨੀਆਂ ਭੋਲੀਆਂ ਗੱਲਾਂ ਕਰਦੀ ਰਹਿੰਦੀ ਹੱਸ-ਹੱਸ ਕੇ,
ਕਮਲੀ ਜਿਹੀ ਨੂੰ ਸਮਝਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਮੰਨਿਆ ਬੜੇ ਕੰਮ ਲੋਟ ਆ ਗਏ ਐਨ.ਪੀ.ਸਿੰਹਾਂ ਤੇਰੇ,
ਹਰ ਵਾਰ ਤੁੱਕਾ ਲਾਉਣਾ, ਥੋੜ੍ਹਾ ਔਖਾ ਹੁੰਦਾ ਏ।
ਨਰਿੰਦਰ ਪਾਲ ਸਿੰਘ ਜਗਦਿਓ
No comments:
Post a Comment