ਹਰ ਵਾਰ ਤੇਰੇ ਸੂਟ ਵਰਗੀ ਪੱਗ ਬੰਨ੍ਹਾਂ, ਇਹ ਜ਼ਰੂਰੀ ਨਹੀਂ।
ਤੂੰ ਜੋ ਕਹੇਂ ਉਹੀਂ ਗੱਲ ਮੰਨਾਂ, ਇਹ ਜ਼ਰੂਰੀ ਨਹੀਂ।
ਪੱਥਰਾਂ ਨੂੰ ਸਜਦੇ ਕਰਨੇ ਵਾਲੇ ਲੱਖ-ਕਰੋੜਾਂ ਨੇ,
ਹਰ ਕੋਈ ਬਣ ਜਾਏ ਭਗਤ ਧੰਨਾ, ਇਹ ਜ਼ਰੂਰੀ ਨਹੀਂ।
ਮੈਂ ਤਾਂ ਪਿਆਰ ਨਾਲ ਤੈਨੂੰ ਹੀਰ ਸਲੇਟੀ ਕਹਿੰਦਾ ਹਾਂ,
ਤੂੰ ਕੁੱਟ-ਕੁੱਟ ਲੈ ਆਵੇਂ ਚੂਰੀ ਦਾ ਛੰਨਾ, ਇਹ ਜ਼ਰੂਰੀ ਨਹੀਂ।
ਮੇਰੀ ਕਿਸੇ ਵੀ ਗੱਲ ‘ਤੇ ਜੇ ਇਤਰਾਜ਼ ਤਾਂ ਨਾਂਹ ਕਰ ਦੇਈਂ,
ਹਰ ਗੱਲ ‘ਤੇ ਤੂੰ ਹਾਹੇ ਨੂੰ ਲਾਵੇਂ ਕੰਨਾ, ਇਹ ਜ਼ਰੂਰੀ ਨਹੀਂ।
ਵਿਚਾਰਾਂ ਦਾ ਟਕਰਾਅ ਤਾਂ ਅਕਸਰ ਹੋ ਹੀ ਜਾਂਦਾ ਏ,
ਰਿਸ਼ਤੇ ‘ਤੇ ਕੋਈ ਅਸਰ ਪੈ ਜਾਏ ਚੰਨਾ, ਇਹ ਜ਼ਰੂਰੀ ਨਹੀਂ।
ਮੇਰੀ ਪਿਆਰ ਕਿਤਾਬ ਦੇ ਹਰ ਵਰਕੇ ‘ਤੇ ਨਾਂ ਤੇਰਾ ਲਿਖਿਆ,
ਏਨੀ ਗਹੁ ਨਾਲ ਵੇਖਣਾ ਪੰਨਾ-ਪੰਨਾ, ਇਹ ਜ਼ਰੂਰੀ ਨਹੀਂ।
ਮੰਨਿਆ ਕਿ ਟੁੱਟਦਾ ਨਹੀਂ ਏ ਲੁਧਿਆਣੇ ਤੋਂ ਮੋਹ ਤੇਰਾ,
ਝੂਠੀਂ ਕਹਿਣਾ ਸੋਹਣਾ ਸ਼ਹਿਰ ਏ ਖੰਨਾ, ਇਹ ਜ਼ਰੂਰੀ ਨਹੀਂ।
ਨਰਿੰਦਰ ਪਾਲ ਸਿੰਘ ਜਗਦਿਓ
No comments:
Post a Comment